கண்டி பகுதியில் 15 வயது சிறுமி ஒருவரை பாலியல் துஷ்பிரயோகம் செய்ததாகக் கூறப்படும் சம்பவம் தொடர்பில் புத்த பிக்கு ஒருவரும் பெண் ஒருவரும் காவல்துறையினரால் கைது செய்யப்பட்டுள்ளனர்.
விசாரணைகளின் படி, கைது செய்யப்பட்ட 25 வயதுடைய பிக்கு, பாதிக்கப்பட்ட சிறுமியின் தந்தை வழி மாமாவாக இருப்பது தெரியவந்துள்ளது. அவர் பஹிரவகண்ட பகுதியிலுள்ள விகாரை ஒன்றில் பணியாற்றியதாக அதிகாரிகள் தெரிவித்துள்ளனர்.
பெண் கைது செய்யப்பட்ட விதம்.
இதேவேளை, குற்றச்செயலுக்கு துணைபுரிந்ததாக சந்தேகிக்கப்படும் அதே பகுதியைச் சேர்ந்த 29 வயதுடைய பெண்ணும் கைது செய்யப்பட்டுள்ளார். மே 20ஆம் தேதி கைது செய்யப்பட்ட இருவரும் பின்னர் கண்டி நீதவான் நீதிமன்றத்தில் முன்னிலைப்படுத்தப்பட்டனர்.
கைது செய்யப்பட்ட பிக்குவை இன்று வரை விளக்கமறியலில் வைக்குமாறு கண்டி நீதவான் உத்தரவிட்டுள்ளார்.அதேநேரம், பெண் சந்தேகநபருக்கு தலா ரூ.200,000 பெறுமதியான இரண்டு சரீரப் பிணைகளில் நீதிமன்றம் பிணை வழங்கியுள்ளது.
பாலியல் குற்றச்சாட்டால் அதிர்ச்சியில் கண்டி மக்கள்.
பாதிக்கப்பட்ட சிறுமியின் அடையாளத்தை பாதுகாப்பதற்காக மேலதிக தகவல்களை அதிகாரிகள் வெளியிடவில்லை. சம்பவம் தொடர்பில் கண்டி காவல்துறையினர் மேலதிக விசாரணைகளை முன்னெடுத்து வருகின்றனர்.
அண்மையில் அனுராதபுரத்தில் மற்றொரு புத்த பிக்கு மீது 10 வயது சிறுமி ஒருவரை பாலியல் துஷ்பிரயோகம் செய்ததாக குற்றச்சாட்டு எழுந்திருந்தது. அந்த வழக்கும் தற்போது நீதிமன்றத்தில் விசாரணையில் உள்ளது.
