நாட்டில் எரிபொருள் விலைகள் அண்மையில் உயர்த்தப்பட்டிருந்தாலும், எரிபொருள் விநியோகத்தில் எந்தவித தடையும் அல்லது தட்டுப்பாடும் ஏற்படாத வகையில் அரசாங்கம் தேவையான அனைத்து நடவடிக்கைகளையும் மேற்கொண்டு வருவதாக ஜனாதிபதி அனுர குமார திசாநாயக்க தெரிவித்துள்ளார்.
அமைச்சரவை கூட்டத்தில் எரிபொருள் விலை உயர்வு, அந்நியச் செலாவணி நெருக்கடி மற்றும் நாட்டின் பொருளாதார நிலைமை குறித்து விரிவாக ஆராயப்பட்டது.
நாட்டின் பொருளாதார பாதுகாப்பை வலுப்படுத்தும் திட்டங்கள்.
கடந்த ஏப்ரல் மாதம் வரை நாட்டின் இறக்குமதி செலவு இரண்டு பில்லியன் அமெரிக்க டொலர்களைத் தாண்டியுள்ளதாக ஜனாதிபதி சுட்டிக்காட்டினார். அந்நியச் செலாவணி கையிருப்பை பாதுகாப்பதற்காகவே வாகன இறக்குமதிகளுக்கு கூடுதல் கட்டணங்கள் விதிக்கப்பட்டதாகவும் அவர் தெரிவித்தார்.
பொருளாதார மீட்சியை உறுதிப்படுத்தும் வகையில் பல்வேறு திட்டங்கள் நடைமுறைப்படுத்தப்பட்டு வருவதாகவும் அவர் தெரிவித்தார்.
அத்தியாவசிய பொருட்களின் தொடர்ச்சியான விநியோகத்திற்கு அரசு உறுதி.
எரிபொருள், எரிசக்தி மற்றும் உர விநியோகத்தில் ஏதேனும் குறைபாடு ஏற்பட்டால் அது நாட்டின் உற்பத்தித் துறையையும், பொருளாதார நடவடிக்கைகளையும், மக்களின் இயல்பு வாழ்க்கையையும் தீவிரமாக பாதிக்கக்கூடும் என ஜனாதிபதி அனுர குமார திசாநாயக்க தெரிவித்துள்ளார்.
எனவே, அத்தகைய சூழ்நிலைகள் உருவாகாமல் தடுப்பதற்காக சம்பந்தப்பட்ட அதிகாரிகளுக்கு தேவையான வழிகாட்டுதல்கள் வழங்கப்பட்டுள்ளதுடன், தொடர்ச்சியான கண்காணிப்பு நடவடிக்கைகளும் முன்னெடுக்கப்பட்டு வருவதாக அவர் குறிப்பிட்டார்.
