இலஞ்சம் மற்றும் ஊழல் விசாரணை ஆணைக்குழு (CIABOC) 2026 ஆம் ஆண்டுக்கான வருடாந்த சொத்து மற்றும் பொறுப்பு விபரங்களை சமர்ப்பிப்பதற்கான இறுதித் திகதி ஜூன் 30 என அறிவித்துள்ளது. ஊழல் எதிர்ப்புச் சட்டம் இலக்கம் 9 (2023) இன் 80(1) பிரிவின் கீழ் அனைத்து வரையறுக்கப்பட்ட அரச அதிகாரிகளும் தொடர்புடைய தரப்பினரும் தங்கள் சொத்து விபரங்களை கட்டாயமாக சமர்ப்பிக்க வேண்டும் என ஆணைக்குழு தெரிவித்துள்ளது.
பணிப்பாளர் நாயகம் ஆர்எஸ்டி ஜயநாயக்க இந்த விதிமுறையை கடுமையாக அமல்படுத்துவதாகவும், தவறும் நபர்களுக்கு எதிராக சட்ட நடவடிக்கை எடுக்கப்படும் என்றும் எச்சரித்துள்ளார்.
சொத்து விபர வெளிப்படுத்தல் விதிகளில் புதிய மாற்றங்கள் அறிமுகம்.
புதிய சட்டத்தின் கீழ் முன்பு 1975 ஆம் ஆண்டின் 1 ஆம் இலக்கச் சட்டத்தின் கீழ் பதிவு செய்திருந்தவர்களும், தற்போது புதிதாக சேர்க்கப்பட்டுள்ள பல்வேறு தரப்பினரும் சொத்து விபரங்களை சமர்ப்பிக்க வேண்டும்.
இதில் பதிவு செய்யப்பட்ட தொழிற்சங்கங்களின் நிர்வாக அதிகாரிகள், பத்திரிகை நிறுவன உரிமையாளர்கள், ஆசிரியர்கள் மற்றும் ஆசிரியர் குழு உறுப்பினர்கள், தனியார் வானொலி மற்றும் தொலைக்காட்சி நிறுவனங்களின் உரிமையாளர்கள் மற்றும் பணியாளர்கள் ஆகியோர் அடங்குவர். தேசிய விளையாட்டுச் சங்க அதிகாரிகள் மற்றும் சுங்கத் திணைக்கள அதிகாரிகளும் இந்த வரையறைக்குள் வருகின்றனர்.
மின்னணு முறைமையின் மூலம் மட்டுமே சொத்து விபர சமர்ப்பிப்பு கட்டாயம்.
இந்த ஆண்டிலிருந்து அனைத்து சொத்து மற்றும் பொறுப்பு விபரங்களும் மத்திய மின்னணு (Electronic) முறைமையின் ஊடாக மட்டுமே சமர்ப்பிக்க வேண்டும் என ஆணைக்குழு அறிவித்துள்ளது.
இந்த புதிய முறைமையால் வெளிப்படைத்தன்மை அதிகரிக்கப்படும் என்றும், தரவு மேலாண்மை எளிதாகும் என்றும் அதிகாரிகள் தெரிவிக்கின்றனர். குறிப்பிட்ட காலத்திற்குள் சமர்ப்பிக்க தவறும் நபர்களுக்கு சட்ட நடவடிக்கை எடுக்கப்படும் எனவும் ஆணைக்குழு மீண்டும் வலியுறுத்தியுள்ளது.
