அமைச்சர் வசந்த சமரசிங்க, 2029 ஆம் ஆண்டிலும் ஜனாதிபதி பதவியை அநுர குமார திஸாநாயக்கவே தொடர்ந்தும் வகிப்பார் என்ற உறுதியான நம்பிக்கையை வெளியிட்டுள்ளார். இலங்கை ஈட்டி எறிதல் வீரர் ரோமேஷ் தரங்க தனது இலக்கை நோக்கி ஈட்டியை துல்லியமாக எறிவதைப் போல, அநுர குமார திஸாநாயக்கவும் தெளிவான நோக்கத்துடனும் உறுதியான வழிநடத்தலுடனும் அரசியல் பயணத்தை முன்னெடுத்து வருகிறார் என அவர் தெரிவித்தார்.
அரசாங்கம் விரைவில் சவால்களை எதிர்கொண்டு வீழ்ச்சியடையும் என சில தரப்புகள் எதிர்பார்த்து வந்தாலும், அவ்வாறான கணிப்புகள் வெற்றியடையாது என்றும் அவர் குறிப்பிட்டார்.
பொருளாதாரத்தை நிலைநிறுத்தும் அரசு.
உலகளாவிய பொருளாதார நெருக்கடிகள் மற்றும் மத்திய கிழக்கில் நிலவும் பதற்றமான சூழ்நிலைகள் காரணமாக எரிசக்தி விநியோகம் மற்றும் கடல் போக்குவரத்து செலவுகளில் சவால்கள் உருவாகியுள்ளன இருப்பினும், அரசாங்கம் நாட்டின் பொருளாதாரத்தை வெற்றிகரமாக நிர்வகித்து வருவதாக அவர் கூறினார்.
அந்நியச் செலாவணி கையிருப்பை 7 பில்லியன் அமெரிக்க டொலர் அளவில் பேணுவதே அரசாங்கத்தின் முக்கிய இலக்காக உள்ளதாகவும், உலக வங்கியின் நிதி ஆதரவு தொடர்ந்து கிடைத்து வருவதாகவும் அவர் தெரிவித்தார்.
எதிர்க்கட்சிகள் முதலில் ஒன்றிணைய வேண்டும் என வசந்த சமரசிங்க சவால்.
டொலரின் மதிப்பு 350 ரூபாயைத் தாண்டும் என சில தரப்புகள் பரப்பிய தகவல்கள் உண்மையல்ல என அமைச்சர் தெரிவித்தார். தற்போது டொலரின் பெறுமதி 340 முதல் 345 ரூபாய் வரையிலான அளவில் நிலைத்திருப்பதாக அவர் சுட்டிக்காட்டினார்.
மேலும், மீண்டும் ஜனாதிபதியாக வர வேண்டும் என கனவு காணும் அரசியல்வாதிகள் முதலில் தங்களுக்குள் ஒற்றுமையை உருவாக்கிக் கொள்ள வேண்டும் என அவர் அறிவுறுத்தினார்.
